ನನ್ನ ಭಾನ್ವಿ

 ತೀರದ ನೆನಪು

ಸದ್ದು ಗದ್ದಲದ ನಡುವೆಯೇ
ನೆನಪಾಗುತಿಹಳು ನನ್ನ ಭಾನ್ವಿ
ಕಣ್ಣ ಕನಸಿಗೆ ಹಸಿಯಾಗುತಿಹಳು
ಪ್ರೇಮಮಯಿ  ಭಾನ್ವಿ
ನನ್ನ ಮನದೊಳಗಿನ ನಲ್ಮೆಯ
ಒಲವು ಮತ್ತೆ ಚಿಗೊರೊಡೆಯುತಿದೆ
ಮನ ಮಿಡಿಯುತಿದೆ, ಮಾಸದ
ಅವಳ ಸ್ನೇಹ ಸ್ಪರ್ಶಕೆ.

ಸಾಕೆನಿಸಿದೆ ಅವಳಿಲ್ಲದೆ ಕಳೆದ
ಖಾಲಿ, ಖಾಲಿ ದಿನಗಳು
ಸುಖವಿಲ್ಲದೆ, ಬೆಚ್ಚಗಿನ ಪ್ರೀತಿಯಿಲ್ಲದೆ
ನಗುವಿಲ್ಲದೆ, ಸಾಧನೆಯಿಲ್ಲದೆ
ಮುಗಿಯದ ಮಾಯಾಲೋಕವಿಲ್ಲದೆ

ಅವಳೆಂದು ನನ್ನ ಬಿಟ್ಟು ನಡೆಯಲಿಲ್ಲ
ಕಾಲವೇ ಕೈ ಹಿಡಿದು ನಡೆಸಿತು
ಅವಳನ್ನು  ಬಾಳ ನದಿಯ
ಇನ್ನೊಂದು ತೀರದಲಿ
ಹಚ್ಚ ಹಸಿರ ಹಾದಿಯಲಿ

ಅದೇಕೋ ಅವಳೂ ನಡೆದಳು
ಕಾಲದ ಅಳಲಿಗೆ, ಮೌನವಾಗಿ
ಇನ್ನೆಂದೂ ಬಾರದ , ಕಾಣದ
ತೀರದ ನೆನಪುಗಳಲಿ, ಭಾರದ ಹೆಜ್ಜೆಯಲಿ
ಸದ್ದು ಗದ್ದಲದ ನಡುವೆಯೇ
ನೆನಪಾಗುವಳು ನನ್ನ ಭಾನ್ವಿ.

                                            

                                                                                 ಅಲೆಮಾರಿ